المحروسه
=====
أنا منك أنا ليكى
أنا بيكى
أنا الشمعه
إللى بتنور لياليكى
أنا الفرح
إللى خاد كفك يحنيكى
أنا الطوق
إللى فى رقبتك بيضويكى
أنا عود الريحان الأخضر
عبير ليكى
أنا القمر
إللى بات سهران يسليكى
أنا النجم
إللى جاى فرحان يناديكى
أنا الشمس
إللى فارشه حنان طريق ليكى
أنا الجندى
وبر أمان بيحميكى
أنا البحر
إللى حضن الشط فى عنيكى
أنا هلالك أنا جرسك
أنا محراب فى واديكى
أنا درعك أنا حرسك
أنا المانع مقويكى
أنا الدم إللى سال أنهار
عشان بالعز يرويكى
أنا التاج إللى كله فخار
على راسك معليكى
أنا النيل
إللى جاى بالشهد يسقيكى
أنا الدم فى شريانك
أنا النبض إللى عاش بيكى
أنا الماضى أنا الحاضر
أنا بكره الأمل ليكى
أنا المصرى أنا العربى
أنا الحق إللى قام بيكى
أنا التكوين فى عقد سنين
ياقوت مرمر قصور ليكى
=====
بقلمى سامح توكل أبوالسبح
ليست هناك تعليقات:
إرسال تعليق