لسه شارى
( لسه شارى)
لسه باقى ع المحبه
والموده والعيال
لسه شارى وقلبى فاتح
للرجوع أوسع مجال
إفتكرلى حاجة حلوة
وافتكرلك الجمال
دالشيطان .داخل مابيننا
بيقطّع حبل الوصال
حبه منك حبه منى
والأمور رح تبأه عال
دانا ياما شقيت عشانك
وقلبى فى الدنيا شال
انتا نسيت لما إتعاهدنا
نعيش سوا على كل حال
واللى بيننا يبأه سر
زى حصوه فى الجبال
فى الحلوه والمره نبأه
فى سعاده واحتمال
الحياه على ده وده
فى مراحل وانتقال
يوم معانا يوم مافيش
أهم حاجه راحة البال
هوه مين م الدنيا واخد
فى قبره دهب ومال
داللى بيدخل فى جنه
هوه ده اللى حظه عال
واللى على النار يساق
هوه ده اللى بخته مال
المحاكم دى متاهة
وحِبال جَرّه حِبال
والمحامى م الفلوس
كل يوم عاوز شوال
اللى راح ياخده المحامى
اللى أولابه العيال
ياما ياما بيوت بتخرب
م العناد والقيل وقال
صدقينى ياحبيبتى
افهمى يابنت الحلال
اللى بيقولك طلاق
رأيه ده مش فى اعتدال
الطلاق مش كلمه سهله
دى أشد من القتال
كلمة فالته من اللسان
بغباوه وانفعال
الطلاق ماهوش حرام
لكنه أبغض الحلال
الطلاق عند الشيطان
بين زوجين أسعد منال
تعالى ننسا عشان ولادنا
نقضى على كلمة محال
نفتح صفحه تانى بيضه
يشهدو عليها الرجال
فى مابيننا ولاد فى حاجه
لحضن مليان بالآمال
لما نتفرق يضيعو
فى المهالك والضلال
هما دول عندى وعندك
أغلى م الدهب والمال
الحياه مش مؤخر
ولا قايمه بالعزال
الحياه رحمه وموده
وللحقوق وفا وامتثال
قلتلك كل اللى عندى
وربى شاهد ع المقال
مش خضوع ولا ضعف منى
دى أصاله واكتمال
(زجل)
شاعر الإحساس
(رضا عبد الحميد)
ليست هناك تعليقات:
إرسال تعليق