هــــــــــــمـــــــــــــــوم الدنـــــــيـــــا بقلم توفيق بومدين

هــــــــــــمـــــــــــــــوم الدنـــــــيـــــا
لا تزيديش فهوالي
يا الماشطة شعورك على بعضين
وزايداني فهبالي
ملي حليت عيني فيك يا الدنيا
همي ما بغى يسالي
كليت من خبزك شلا مرار
كاس الصبر خوالي
كنت صغير مدهي مع قراني
قلت غدا نكبر وتتبدل حوالي
مشات ليام وجات يام
عكازي تهرس والظهر تقوس
والنظر مشالي
عييت نسقسي ونسول
بغيت نعرف آش جرالي
بدهاويك يا الدنيا
من تخمام الناس فيك
حتى واحد ما جاوبني على سؤالي
تساريت بين دروبك
عييت نقلب عل الهنى
سهرت يام وليالي
كل واحد يلغي بلغاه
حرت آش ندير معاك
راه لكتف عيالي
نعتوني شلا صبعان ما نصحوني
ما لقيت للي يبالي
الشكوى ليك يا ربي
انت للي عالم بحوالي
قالو الدنيا غير زهر
قلت ما لقيتو فعمامي ولا فخوالي
هي الدنيا هموم فهموم
ما تتسالى حتى يتسلاو قوالي
توفيق بومدين