انا مين
لقيت نفسي بقول انا مين
وقلمي بسرعة كالعادة وكالمجانين
كتب في كلام ملوش معنى
كلام مش شعر مش موزون
وجاب سيرتك في وسط كلامه كالعادة
وقال انا هاحكي بلسانك
واقول انا مين
انا اللي وفيت في وقت ما كلهم خانوا
انا اللي اديت عدوك درس جدا صعب نسيانه
انا اللي برغم كل جراحي جيت ازحف
وبضحكلك وانا المجروح
واجود بالباقي مالانفاس
وبتشاهد
عشان تترد فيكي الروح
ومش عارف
لو انتي بجد
كنتي في يوم وطن ليا
او انتي السحر في عنيكي
او انتي الضي لعنيا
ومش عارف
لو انتي بجد انسية
وانا العفريت
وجوه قمقمي محبوس
او انتي كابوس
ولما هافوق
هتبقي انتي اللي جنية
قوليلي عملتي ايه فيا
حقيقي بجد مش عارف
انا اللي. عملتلك زلزال
او انتي بتهدمي فيا
انا المسكون بكام موال
او انتي حكاية منسية
او انتي كتاب ملوش عنوان
ورغم اني قريته كتير
انا مبحبش الاساطير
ورغم اني في حكاويها امير بيطير
لكني مبحبش الاساطير
انا المكتوب على جبيني
محبش اشوفه بعنيكي
احب اشوفه بعنيا
سبيني افوق عشان اقدر
اقول لا .. اقول حاضر
سبيني اهرب
عشان انساكي وانساهم
متحصرنيش في خانة الماضي والحاضر
انا عايز اعيش بكرة
وانا اللي اختار
اعيشه ازاي اعيش مع مين
لكن لو عشت متكتف
وغيري في امري يتصرف
مظنش تفرق الحالتين
ولا هتفرق كمان انا مين
بقلمي / عدنان فارس
ليست هناك تعليقات:
إرسال تعليق