. قطفة حبق
《 تعريف و إحساس 》
*دمعة صامتة من إمرأة تكفي لتغوص بك في
لجة من الحزن و الألم *
لمن يجيد الغناء من الأصدقاء ليتمتع بها أكثر
.. يا نرجسة لا تدمعي ..
يا نرجسي لا تدمعي
و همسة حنيني اسمعي
يمكن زمانك حيدك
حتى بجهلك تقبعي
يا نرجسي لا تدمعي
يا نرجسي شوفي الطيور
غمرت ربوعا بالسرور
و العطر ب كمام الزهور
فيق جمالا عل الوعي
يا نرجسي لا تدمعي
و المي بالوادي اندلق
يسقي إلي كروم الحبق
و القلب من سجنو انعتق
راجع الك قومي ارجعي
يا نرجسي لا تدمعي
يا مفرفرة بعمر الشباب
من خمرتك يحلا الشراب
قومي اشرقي بعد الغياب
و ع عرش قلبي تربعي
يا نرجسي لا تدمعي
يا حلوتي بكرم الهوى
الله حبانا بالغوى
عنقود بالشوق استوى
قومي كلي تا تشبعي
يا نرجسي لا تدمعي
نسمة حنين ملهوجي
منك انا ناطر تجي
انتي فراشة مغنجي
بزهور كرمي تمتعي
يا نرجسي لا تدمعي
منعو هوانا بالجهل
و العقل غرقان بوحل
و زهور بيضا بهالسهل
صلي ل جمالا واركعي
يا نرجسي لا تدمعي
و مروج بللها الندى
و الحب منها ب يبتدي
قومي اعشقي تا تسعدي
و طيور حولك تجمعي
يا نرجسي لا تدمعي
و الصبح بلش يبتدي
عا نور وجهك يهتدي
و عصفور عا غصنك هدي
و الروح تندهلك تعي
يا نرجسي لا تدمعي
الله بتكوينو خلق
وردة و ملاها بالعبق
و جبين ضاوي بالألق
خلى الدني تفرح معي
يا نرجسي لا تدمعي
لااااااااااااااا تدمعييييييي
عازار الريم سورية
ليست هناك تعليقات:
إرسال تعليق