قصيدتي الجديدة
الحرافيش
بعد تسجيلها وتوثيقها
للشاعر/ رضا علي احمد ابو شنب
٢٦/٧/٢٠١٨
انا يا أمي من الحرافيش
انا ابنك ومن صلبك
واسمي واخده من اسمك
انا الدرويش
انا صخرك انا نهرك
انا بحميكي من قهرك
انا اللي تمللي في ضهرك
انا الجندي اللي
جوا الجيش
انا يا امي من الحرافيش
وزي السمكة جواكي
في غير البحر مش بتعيش
ورغم الغلب انا صابر
ووسط الفقر نافش ريش
ولو عرضو عليا حرير
اعيش فيكي ولابس خيش
ولو اغروني بالجنة
في وسط النار
ااقولك يامه متبكيش
انا يا امي من الحرافيش
عشاية فول وطعمية
ويمكن بيضه مقلية
ولو ملقيش اكمل
يومي بالميه
وبحمد ربي اني بعيش
انام مرتاح و خالي البال
ولا بيقلقني هم عيال
ولا خوفي علي الاموال
واخر همي صرة عيش
انا يا امي من الحرافيش
ولو بغطي رجليا
تبان راسي مع ايديا
واقاسي البرد حواليا
لان غطايا ميكفيش
اقوم الصبح من بدري
علي رزقي اوام اجري
وعشمي كله في ربي
يراضيني ميكسفنيش
انا يا أمي من الحرافيش
ولا عمري اكون صايع
ودايما للامام سامع
واغلب يومي في الجامع
ولا ياخدوني للتفتيش
انا يا امي من الحرافيش
انا يا امي مش طماع
ولا باشا بتاع اقطاع
ولا جورنارجي في مجلة
اقول للناس كلام خداع
ويبقي كلامي كله افيش
انا يا امي من الحرافيش
ولو مرة ابص لفوق
ومن همي بحاول افوق
الاقي نفسي حيرانه
واكون مخنوق
وروحي خارجه من جسمي
لكن بشويش
انا يا امي من الحرافيش
.........................
انا الواقف علي بابك
وكلي حماس
انا السقا لبستناك
وبسقي الناس
انا الصايغ في دكانك
وايدي تتوزن بالماس
انا الفلاح بضربة فاس
واروي زرعي بايديا
وياكل منه كل الناس
انا الشاعر في ديوانك
ببيع الشعر في القرطاس
..........................
انا يا امي مع يوسف
صبرت سنين
شربت المر مع جوعي
وكلي انين
عشقت الصبر علشانك
وعلشانك فضلت امين
عبرت البحر مع موسي
وكنت الجندي في حطين
انا قصة كتبها نجيب
وسابني اكمل السطرين
انا المصري اللي قالو عليه
بيرفع ناس ويرمي
ناس كانت سلاطين
انا يا امي من الحرافيش
الف بلاد وشوفت الصين
وغير حبك ميلزمنيش
انا يا امي من الحرافيش
رضا ابو شنب
ميت غمر
.........
ليست هناك تعليقات:
إرسال تعليق