الكلب المكروح الشاعر محمد حديش

الْگَلبْ المَگْروحْ
*************** (زجل مغربي)

ليكْ الله يا الْگَلبْ المَدْبوحْ

تْباتْ وْتَصْبَحْ مْفَرْفَرْ مَسْفوكْ

عَايمْ فَ ضايَة الطَّعْنَة مَحْگورْ

فَسْدَتْ الْعيشَة وَحْرارْ الْموجودْ

دَقَّة فَ الرَّاسْ وْدَقَّة بْتَهْراسْ الضْراسْ

وَالْكِيَّة كِيْتينْ كْواتْ شَلاَّ جْدورْ

حَقَّكْ مَظْلومْ اتْخادْ صَحَّة مَغْصُوبْ

وَالْوادْ حْمَلْ سَايْگْ شَلاَّ رْيوسْ

تْخَلْوَضْ اصْفَا الْحالْ بْريحَة الْجْدودْ

الطِّيرْ عَلاَّ وْطارْ سْمَحْ فَ لَوْكارْ

ياكْ الْمْدَفْيَة النَّاسْ ديمَا فَ طْلوعْ

آشْ تْبَدَّلْ وَتْزادْ مَنْ غيرْ لَبْهوتْ ؟

الْگَهْمَة شَبْعَتْ وْسَمْنَتْ دارَتْ گْرونْ

نَطْحَتْ الهْبيلْ وْعَرَّاتْ الْمَسْتورْ

الوْقَرْ تْغَرَّبْ فَ زْمانْ ماهُوَ زْمانُو

اللاَّبَسْ امْعَرِّي ارْكَبْ وْدَلاَّ كْراعو

وَالْمَكْسي تْمَلَّطْ اشْمَتْ الْمَقْهورْ

السْكاتْ وَالمَسْكوتْ سْكاتو مَنْعوتْ

تْشَنْشيطْ العْمَرْ دُخَّانو مَحْروگْ

ليكْ الله يا الْگَلبْ الْمَگْروحْ

سْواكَنْ الجَّدْبَة هْزَّاتْ الْمَجْدوبْ

دَنْدَنْ بْ اوْتارْ الْكِيَّة جْبالْ وبْحورْ

لله يا داكْ المْدَمْدَمْ مالَكْ مَضْبوعْ

حَلْ وَدْنيكْ وَفْهَمْ غَمْزَة الْحْروفْ

لا تْكونْ فَ الخَطْوَة تَايَهْ مَتْلوفْ

بقلم محمد حديش
م͠ج͠د͠و͠ب͠ آ͠ل͠ح͠رف͠
29/08/2018