بأيدينا الشاعرة عبير درويش

بأيدينا !!!!!
هو احنا ليه بنعمل كده فينا
بنعذب نفسنا بأيدينا
ندخل حكايات مش مكتوبه لينا
نرسم أحلام كبيرة علينا
ناخد اكتر ماللي يكفينا
نبعد أعز الأحباب لينا
يقتلنا الشوق ليهم نكابر
ونخبي عشان ما يبانش علينا
ومش بعيد نفضل سنين
العند يشيل ويحط فينا
ونضيع عمرنا في الهم
ونرجع نقول مش بأيدينا
مش بنفكر مره قبل
مالسنين تسافر بينا
وغرورنا يتحكم فينا
ونشكي من القسوة اللي اصلاً
عايشه جوانا بتأذينا
بنشغل بالنا بعيوب غيرنا
واحنا عيوبنا ضاقت بينا
والمجروح لو مرة يشكي
ندوس على جرحه
ونقوله أبعد ....
ده احنا فينا اللي مكفينا
وأصل الحكايه من البدايه
احنا اللي كتبناها بأيدينا
عبير درويش 🌹