إتشعبط فيا بقلم الشاعر محمد ضباشه

إتشعبط فيا
الشاعر محمد ضباشه
---------
ممكن ..تتشعبط فيا
وتعالـي أتشعبط فيك
نعدي من الوجع الباصص
من جوه عينيك
ونداوي الحلم المدبوح
علي كف ايديك
أنا بيك متقوي
وعكازي معاك يحميك
ومعاه باقي أيامي
جايه تتونس بيك
ولو تاهت مني تموت
والله من خوفها عليك
خليك متشعبط
وتعالي نبني جدارنا المايل
وأوعاك تتحايل علي طوبة
ما هي عارفه ماضيك
ولا حاسهب ألم الجرح
في فرح القلب
وفي نبض الدور الغرقانه
في الليل حواليك
أوعي يهزك ريح وتخاف
وتتوه مني بخوفك
ووجعنا تعود أيامه
ويأثر فيا وفيك
وأوعي تغشك
كل شموس الزيف
وتهرب وتبيع أراضيك
وأرجع ما ألاقيك
ويايا بنفس الطهر
وبنفس القلب
وبنفس الطيبة
اللي ما عارفه إزاي تراضيك
إتشعبط في بساط الحلم
ومهما يروح وياه
وان حاول يهرب منا
نهرب جواه
نرسم له سفين وشراع
وأمل العين تهواه
وأرتاح أنا وأنت شوية
ونكمل تاني معاه
وتعالي نبني لنا ضريح
علي القمرة السهرانه معانا
يمكن أحفادنا يوم يشوفوه
أو تعجبهم ألحاني
وتقوي صمودهم
كلمات أغانيك
خليك أقوي وقاوم
ارفض كل الوجع الثاير
علي أعتاب لياليك
وأوعي تعود لمرايتك
تفكرك بالزمن الفايت
وأنت خلاص هتعدي
ترجع تلهيك