حكمة صاحبى
*****
يكفى من حال السكات
ليه يا أخويا القلب مات
بص فى مرايتك يا صاحبى
شوف حقيقتك.. خفت ليه
الحقيقة مرة علقم
لو نكتمها اكيد هنندم
قول وصرخ
قول وصرح
الصراحة فيها راحة
خايف من كلب ينبح
بس بكرة بجد نفرح
ايه حكايتك؟ قول يا صاحبى
فى الحقيقة لسه باحبى
خطوة خطوة وتاتا تاتا
قول حقيقتك كده ببساطة
-----
أصل الصدق استباح
زمنه ولى وراح خلاص
راح ادراج الرياح
واحنا لسه فى الكلاس
كده الأمور تفضل بسيطة
وسط ناس هبلة وعبيطة
وما تعملش من الحبة قبة
مش عايزين لمة وزيطة
------
لا يا صاحبى مش هتهرب
مش هتلاقى منى مهرب
انت فاكرها تنس ومضرب
رمية والتانية وتغلب
الحقيقة وش واحد
وش ابيض مش رمادى
مش هنلعب حادى بادى
انا فى الحقيق لسه صامد
مش هاقبل يوم تستباح
وهعالج كل الجراح
بس ساعدنى وخد بأيدى
انت فرحى وأنت عيدى
-----
بصراحة مش ها قدر أساعد
انا فى الحقيقة مش هعاند
الدنيا مش عايزة الحقيقة
مش عايزة حكمتك البريئة
انسى قلبك وألغى عقلك
كده كل الناس تحبك
بس اوعى تقول الحقيقة
اوعى تقول الحقيقة
-----
يوه عليك' خايف يا صاحبى
ده وباء فتاك ومعدى
لازم نلاقيله العلاج
الحقيقة نور سراج
ليه نعيش فى حياتنا كدبه
دوق نصيحتى حبة حبة
------
اصحى يا صاحبى وفوق
الكلاب واكله الحقوق
وأنت لسه عايز تغنى
بيع القضية خدها منى
يكفى من حلم الحقيقة
يكفى ما اتقدهاش حريقة
خلى الوحش عنا نايم
لو سامعك هيهب قايم
-----
مش هاتهز من كلامك
ولا هارجع عن طريقى
ومهما كان فى الحق رأيك
يوم هترجعللى حقيقى
ده الحقيقة شفا وبلسم
واكيد هتيجى يوم وتقسم
إن كلامى مش أغانى
وإن الحقيقة مش أمانى
بقلمى/ابوالفضل عبدالعزيز
ليست هناك تعليقات:
إرسال تعليق