ما بقا ما يعجب
المقهور يبكي ب الدموع
ما راضي ب الغلبة
قهروه باش يطوع
و يبوس اليد و الركبة
و اليتيم من شجرة مقطوع
يلا ندب جات معاه الندبة
جوعو يكسر الضلوع
لا سكنى لا عتبة
مول المال شانو مرفوع
و طامع ف مول الخربة
ف المحاكم كلامو مسموع
يحرف المحضر ب الزربة
و الدرويش بريء و متبوع
زورو ليه المحضر ف لكتبة
حقو ف المحاكم مبيوع
و المحامي داخل ف اللعبة
و الحامل لكتاب الله مخلوع
ما قاد ينطق بشرع الله فالخطبة
خايف يطردوه يبقى ب الجوع
ينزلوه من المنبر لا راتب لا رتبة
الحق ولى مقموع
دفنوه حي و ردمو عليه بالزربة
و الباطل ولى مسموع
رحبو به و فرشو ليه الرحبة
علي الگرش : 2018/05/27
ليست هناك تعليقات:
إرسال تعليق