الدوخة بقلم الكاتب / ابراهيم خليفة رمضان

الدوخه إبراهيم خليفة رمضان
القمره بدور حوالين الشمس
الشمس بدور حواليها الارض
الارض فوق منها الناس
عالم حساس محتاس
والدوخه بدوخ بالارض
وحنا بنوقع واحد ورى واحد
مش عارفين مين فينا الواقف
مين فينا القاعد
مين فينا راح بالدوخه
اصل الدوخه بدور بالراس
يفقد جوانا العقل المتخبى
كل مراكز الاحساس
ميحسش غير بالدوخه
والدوخه معناها دوران
من ساعة ما وعيت ع الدنيا
وانا بعرف
كل الناس بتخاف م الضلمه
لما بتيجى بالدوخه
اصل زمان اول لعبه اتعلمناها
ازاى اندوخ
ونسابق بعض
مين يقدر فينا يدوخ حوالين نفسه
 اكتر م التانى
نستدعى الدوخه فتيجينا
نوقع نتشقلب على بعضينا
منحسش غير والدنيا بالمقلوب
وكأن السما نزلت فى الارض
والارض خدتنا لفوق
نتشعبط ونضبع فى الارض
مش عارفين مين فينا الواقف
 مين فينا القاعد
مين فينا هيوقع قبل التاني
والسما تحتينا ولا فوقينا
و إيه غير حال الكون بالظبط
ولما اكبرنا ووعينا
فتحت لينا الدنيا بيبانها
وقالت ياللا
مين فيكوا هيوقع قبل التانى فى الدوخه