حكاية عشق بقلم الشاعر محمد الشرقاوي

حكاية عشق
______________________
حكاية عشق مش ممكن
هتتكرر
وقصة شمس بتسافر
وبتنور
أنا بيها
وأحلامي هنا فيها
وحافظ جوه شرياني
معانيها
يا مصر يا جنة الدنيا
تعيشي يا غالية منصورة
وعشقك ما اختفى ثانية
ولا بعدتي عن الصورة
ولادك هم حراسك
وعزك جاي من فاسك
فضمي بسرعة ما تخافي
جميع أهلك هنا وناسك
ورشي طموح
وداوي جروح
عشان يفضل هنا حبك
حياة الروح
سنينك أصبحت شكوى
وأمجادك بقت ذكرى
وأطيارك
وأغصانك
بتنده حلمها بكرة
خديها نصيحة من عاشق
وصميها
عشان نرجع هنا نسابق
ونبنيها
عدالة وحب مش أكتر
نلاقي الدنيا تتلون
بلون أخضر
عدالة وحب مش أكتر
يا قصة شمس بتسافر
وبتنور
حكاية عشق مش ممكن
هتتكرر
_____________________
شعر / محمد الشرقاوي