يا باب البيت
شو صارت
درفاتك قديمة
تاكي عا بعضك
والحجر العتيق
صاينك حواليك
شو استقبلت
بأيام العز
احبابك
واصحابك
صار الك عمر
واقف وتاكي
عا بعضك
تاريخك بيخبر
عنك
والقفل لمسكر
مصدي مخلوع
عم بيمثل عليك
تعجبت من أهلك
وناسك وليش
تعاملت هيك؟
الخشب ما عاد
صامد تحتخو الزمان
وكلك اهتريت
زوايا الحيطان
بين كل حجر
وحجر نبتت
زهرة برية
حابه تزينك
وهمك تنسيك
وعتبتك غطاها
العشب بأيامك
المنسية
وعمل حواليك
متل جمعة ولمة
هيك يمكن ما يتعود
حزنان
ولو ليش هيك انتسيت؟
حبيت أحبابك وحميتهن
تا انهديت
كتمت سرهم وكل
ما قرب حدا تا
يعرف خبارهم
صديتهم وسكرت
بوجهم بابك
مش حلوة بحقك
تنترك هيك
انت باب البيت
وممر عبور
لأجمل الخلان
مش حلوة بحقك
تنترك هيك
وتبقى ذكرى
وتنفنى مع الأيام
عم تدمع عيوني
عليك
كل ما من صوبك
انا مريت
ليست هناك تعليقات:
إرسال تعليق