همسات (5)
_____________________
شوفوا بيعمل إيه بشار
ظلم وقتل خراب ودمار
والشياطين دايماً ساكتين
أصل حياتهم ذل وعار
______________________
أنا وطني عاشق ترابك
يا مصر يسلم شبابك
حني عليا وقولي لي
ليه طال عن النور غيابك
______________________
وياما اتكلمو بأحاسيس
وكانوا ف الطرق فوانيس
ولما اتمكنوا خانوا
وطلعوا كلهم جواسيس
______________________
نظرة وكلمة بشوق ومعاد
خلوا القلب يلف بلاد
بكرة هنحلم بكرة هنرسم
كل حياتنا غنا وأعياد
______________________
ليه بنصدق أي حوار
يعمله جاهل وللا حسود
بعد الليل بيهل نهار
والأفراح لقلوبنا تعود
______________________
حقك يا بني وانتي يا بنتي
أحلى معاملة بدون تهديد
علم وصحة وحلم يخلي
كل الدنيا سعادة وعيد
_______________________
راسم صورتك جوه ف قلبي
راسم بدر بيحضن حبي
شايف نورك عدى بحورك
خدني ما قادر عنك أخبي
_______________________
ليه الدنيا بتلعب بينا
تسرق عمرنا بابتسامات
عمرها يوم ما تحن علينا
ولا بتقرب لنا مسافات
_______________________
شعر / محمد الشرقاوي
الاثنين، 26 فبراير 2018
همسات 5 بقلم الشاعر محمد الشرقاوي
الاشتراك في:
تعليقات الرسالة (Atom)
ليست هناك تعليقات:
إرسال تعليق