المزاد
بعيد عن السياسة
والنجاسة
والفساد
بعيد قوي
عن همنا
المر اللي زاد
*****
بعيد أوي عن كل تكه
عن غنم في المرعى فكه
جربانين بيحكوا حكه
طباخين بيعكوا عكه
عن يهود سافروم لمكه
عن رعاه في الحق سكه
عن سياسه
عن نجاسه
عن فساد
عن هموم ماليه الولاد
بعيد وهنسى كام كابوس
عن كل مرارات النفوس
عل عاموا
وعوموا همه الفلوس
عل الأزون اللي إتخرم
وجنيه بلدنا المحترم
اللي قلع بلبوص
عن سياسه
عن نجاسه
عن نخاسه
عن فساد
عن حكم قراقوش
اللي عاد
*****
بعيد وهبعد عن تروس
بيطحنوا فيها النفوس
واللي شايل سيفه فيها
اللي طبل أو جاسوس
و التتر ويا المجوس
واللي بيربي التيوس
وبينشر الاحقاد
*****
بعيد وهحكي عننا
والكل هيجيني هنا
وهيتفتح أحقر مزاد
*****
فيه البشر
اللي إنتشر
والحلم وياه اتحشر
جوه في باترينة سواد
*****
فيه القلق
واللي اتخلق الكون عشانه
رخصوه ولبسوه
توب الحداد
*****
فيه الكرامه بتنحني
وعزة النفس ببلاش
فيه اللي عامل ثورجي
واتلم ويا العربجي
وهتفوا للأوباش
*****
وفيه تلاقي البلطجي
واللي شغال بوسطجي
وبيخدم النتاش
*****
فيه نخاسين أخر زمن
واللص هو المؤتمن
والغالي مايسواش
*****
فيه المنافق والمكابر
واللي بيحتلوا المنابر
الندل والغشاش
*****
فيه اللي توه أصلنا
بيدوس شرفنا وعرضنا
وإبن الأصول مابقاش
*****
فيه بحور النور غويطه
أصل اللي رسم الخريطه
في الأصل كان حشاش
*****
يامصر يا ام البلاد
أنا مش هجيب سيرتك
*****
انا بس هعلن مزاد
عنك وعن حيرتك
*****
وازاي باعوكي الولاد
وبيمحوا ف مسيرتك
*****
ولاد الكلب كسروكي
وإتخلوا عن جيرتك
*****
وباعو كل اللي حبوكي
واترمجحوا ف سيركك
*****
إحنا اتخنقنا
وخنقنا
كل اللي خانقينك
واحنا اللي كنا السبب
واحنا اللي بايعينك
واحنا اللي سبنا العلل
يغيروا ف دينك
*****
إحنا المزاد
والفساد
*****
واحنا اللي بنبيع نفسنا
للي بيبعوا العباد
*****
إحنا العقول الحيرانين
المتهانين
المليانين هم وسهاد
*****
إحنا العقول الفاضيه
اللي ماليانا بفساد
*****
إحنا اللي خرف
واللي حرف
واللي خلى الذل عاد
*****
إحنا السياسه
والنجاسه
والفهلوه ويا الكياسه
واللي بيخترعوا الحداثه
ف ضلمة الجلاد
*****
إحنا السذاجه الطيبين
إحنا الغلابه الشقيانين
اللي بيتاجروا ف أساهم
واللي سهم الزور عماهم
واللي بيعيشوا ف كمين
وسط الكلاب السعرانين
أهل السياسه
والنجاسه
والفهلوه ويا الكياسه
اللي مليانه بخباثه
واللي ليهم الف دين
*****
أهل السياسه
والنجاسه
واللي عملوا الانتكاسه
للي خوفهم ضمهم
راضيين بكلب يأمهم
ومن دمهم
غاسل إيديه
*****
وكل مايزيد همهم
بيهتفوا بالعزه ليه
*****
أصل الحنين حبهم
وف نور عنيه بيذلهم
وبيبني ذل ف مجدهم
وأهو كله ليه
*****
ازاي وليه
وسؤالي لينا ولجلهم
هل جنسنا
من نفس ملة جنسهم
*****
هل همه عارفين اننا
ما حنش مواشي ف أرضهم
*****
وأرجع وأعيد
هكتب بعيد
بعيد قوي
عن السياسه
والنجاسه
والفساد
وعن ظلمنا
وهم دنيانا اللي ساد
ويالا راح نفتح مزاد
*****
خالد موسى السيد
ليست هناك تعليقات:
إرسال تعليق