يا بن بلدي
مهموم
ومين هتلوم
وإزاي يزول همك
عايش
حزين مؤلوم
وإنت سبب غمك
راضي
تكون مظلوم
والظلم قام ضمك
رافع شعار الفدا
لجل المهانة تدوم
ويبحتروا ف دمك
***
خايف على لقمتك
وف هدمتك ملموم
وفقرنا لمك
غاوي تعيب ف الزمن
تقل الحمول وتلوم
وأنت الشيطان أمك
عمال تطاطي لواطي
والحق مش هيقوم
راح يشتكي وذمك
متعود على الظالم
وراضي تعيش ف ظلوم
لابس هدوم الوفا
وباب الوفا مهدوم
أدمنت كل الردي
وف نهر الأسى بتعوم
ظالم لنفسك
ينافسك حقك المألوم
داقق ببان الرجا
بس الرجا معدوم
وازاي تكون ابنها ...
أو حتى بتحبها
ومن حضنها محروم
خالد موسى السيد
ليست هناك تعليقات:
إرسال تعليق