رباعيات بقلم: صلاح منير
رقم21
اللي رفع العلم بعد ما جاب لك يا مصر النصر
عمره ما تخيل يوم يبقى العلم لحفيده الشهيد كفنه
يتربص له خسيس يقتله ويقبض بالدولار المهر
ويعيش البطل رافع العلم بعد الشهيد بحزنه وبكمده
رقم22
ما شي ياحيلة تعاكس في بنات الناس واللسان عمال
لا دم ولا احساس والأيد طويلة على اللي ما يخصك
دي لابسة ايه ولا ازاي ماشيتها ده كلام عيب يتقال
لو فيك طبع الرجال لأستحيت وداريت م الخجل خيبتك
رقم23
يالي أنت قمر في السما وانا للهوى مخلوق
لعمل قلبي سفينة فضا وأطلع لك بيها لفوق
أمتع عنيا بجمالك الفتان وأطفي نار الشوق
دنا لجمالك عاشق عشمان في رضى المعشوق
رقم24
لا أحب سيرة روبن هوود ولا لقصته غاوي
ولا علي بابا لما اغتنى ومرجانة وقاسم أخوه
ملعونة سرقة فلوس الغير وملعونة دي حكاوي
للضنى تحل سوء السير وأهله ما يعرفوا يردوه
رقم25
بنيت يابني من الأحلام جبل طلع الجبل عالي
لا عرفت تطول أخر الجبل ولا فقت م الأحلام
لو كنت حلمت على قدك وما طلعت في العالي
ما كنت تعيش في توهة وتسرق حياتك الأوهام
صلاح منير
مصر
ليست هناك تعليقات:
إرسال تعليق