السياسي و السنطيحة
________________
يا لطيف يا لطيف
من قوم السنطيحة و لهريف
بمشروبات غازية وعشا اخفيف
و زرقالاف وشي امصيريف
و ب تبسيمة صفرة وكلام معسول لطيف
ضحكوا على المواطن الضغيف
وبوعود واهية كلها تزييف
طايحة من ساعتها بحال اوراق الخريف
قالوا نجهزوا البنية التحتية والرصيف
ونبنيو ليكم شقق بالمكييف
وندمجوا ولادكم فالتوظيف
بحال الأمي بحال المجاز عندنا كيف كيف
خذاو مناصب بين خاطر وسيف
طلعوا لمراتب عليا وبدا التسويف
غي تجي الميزانية نردوا الشارع انظيف
نسرحوا لقوادس واللي بانت ليه شي حاجة يضيف
ونرقيو الموظف اللي عندو السلم ضعيف
قلنا واخا تسنينا عام ونيف
ما وفاو بوعودهم يا لطيف
نتاصلوا بهم يطفيو الهاتف
بعدما كان طبعهم اضريف
ولاو يكلمونا بلهجة التخويف
علاو ف اسمانا بحال سحابة الصيف
ظنيناها تمطر لكن مجرد خيال و طيف
دازت ولاية كحلة زحلة مع كمامر الهيف
شتانا ولى صيف وربيعنا ولى خريف
كرهونا في طرف ديال الرغيف
وعمروا جيوبهم من الثروة بالخطيف
غسلنا يدينا ماكاينش البديل ماكاينش العفيف
حاشا اللي يدو موسخة واش يكون شريف
علي الكرش : في 2017/11/24
ليست هناك تعليقات:
إرسال تعليق