زمان واحنا صغيرين
كنا أقزام قصيرين
كنا بحياتنا فرحانين
ما تلاقي فينا واحد حزين
كل واحد فينا أمير
كأنه لابس توب حرير
أو له جناحين بيهم يطير
كنا نداري الشمس بصباعنا الصغير
كنا نجري ألف ميل وكان قليل
عمر الطريق ما كان طويل
كل واحد له صاحب خل وخليل
صاحب يحبه وله يميل
ولما نتعب نقعد قدام التلفزيون
أبيض وأسود وبقي ميت لون
نتفرج علي أفلام كارتون
وحليم بيغني في التليفون
كنا نقول يلا عدي يانهار
عايزين ياناس نبقي كبار
خلاص كفايه دلع وهزار
زهقنا من كلمة صغار
عايزين بقي نكبر نشب
ويكبر معانا كمان القلب
نلاقي حد ليه نحب
ونبض الحنين فينا يدب
مر الوقت بينا سريع
واتصدمنا بشكل مريع
من بنات بلبس خليع
وشباب لضميرها تبيع
ولد عاق أمه وأبوه
والتاني هابيل قتل أخوه
وده خان اللي يحبوه
حاجة تخلي العقل يتوه
لقينا دنيا مليانه سواد
مافيش إحساس مات الفؤاد
لقينا غابة مكان البلاد
القوي فيها للضعيف جلاد
لقينا عدل قاضيها مات
ما بقي منه حتي الفتات
ظلم من النيل للفرات
كل الضماير في سبات
حكام بتنعم في هناء
قصور فخمه للأمراء
شعب مطحون بالغلاء
ولا عزاء للفقراء
يارب يكون ده كابوس
ولا أكبر وأشوف أسوء نفوس
مصطفي محمد.. ابوزمان
ليست هناك تعليقات:
إرسال تعليق