آه يا بنتي
*******
آه .. يابنتي
جريت الأيام .. كبرتي
فاكره لما
كنت اوطي
تيجي فوق
ضهري تنطي
امش بيكي
تقولي إجري
وانا اقول
امرك ياستي
كنت اشيلك
فوق كتافي
كنت اقولك
إوعي يجيي
يوم تخافي
لو تعبتي
اشربي من
دمع عيني
راح تشافي
لو بردتي
إترمي جوا
في حضني
حضني دافي
لو عطشتي
من حناني
إشربي
بين ايديا
نهل صافي
آه يابنتي ..
جريت الأيام ..كبرتي
ياللي كنتي
تدافعي عني
لو سمعتي
حد يوم جايب
في سيرتي
آه يا بنتي
جريت الأيام .. كبرتي
يوم زفافك
دمع عيني
آآآه
ب اخبي
رايحه بيتك بعد
ما كنتي بقربي
رايحه بيتك
واخده قلبي
لو في مره
شوقي يطغي
ه أجري و الاعب
عروستك
راح ابوسها
اعمل ايه
كأني بوستك
كل املي تكوني
ياقلبي سعيده
حتي لو كنتي
بعيده ..
اعمل ايه
طيب يابنتي
م انتي كبرتي
جريت الايام
كبرتي ..
عصام إمام
4/1
2018
ليست هناك تعليقات:
إرسال تعليق